CAGAYAN DE ORO CITY – Mahurot na’g kahakot ang mga basura nga taud-taod nang na-estangko sa pipila ka bahin sa syudad sulod sa tulo ka adlaw.
Kini ang garantiya nga gipasalig sa kompanyang Tencil Environmental Management o TEM atubangan sa mga ulo sa departamento ni City Mayor Rolando ‘Klarex’ Uy nga iyang gitahasan pagsuta sa suliran ug pagpangita’g sulbad sa nagka-grabeng suliran sa mga basura sa syudad.
Atubangan ni CLENRO Manager Engr Armen Cuenca kuyog ang ubang ulo sa mga gipatawag nga departamento, gihupay ni Tencil operations manager Jermie Danuco nga mahupay na ang maong suliran pag-abot sa adlaw’ng Huwebes.
Gihimo ni Danuco ang pasalig kay natay-og ang atensyon sa city govt epekto sa grabeng gipalanog sa katawhan nga mga reklamo kabahin sa dugay’ng pagkakuha sa mga basura sa ilang tagsa-tagsa ka lokasyon.
Sulti ni Cuenca nga gigarantiya sa kompanya nga tungod sa ipaabot nga pag-abag sa city govt ug pribadong pundok, mahataga’g dinalian nga solusyon ang paghaw-as sa mga basura sa dakbayan.
Dumduman nga mikasa usab ang commitees on environment ug laws and rules sa konseho nga ipatawag ang Tencil aron matuhog ang rason nganong nagkasalimuang ang koleksyon sa mga basura sa milabay’ng mga semana.(Photo:Rod Constantino/CIO).
