NAPUTOL na ang halos duha ka dekada nga pagpanago sa giilang national most wanted nga si alias “Teniente Preacher Jacob,” human sa nagmalampusong joint operation sa kapulisan ug mga concerned agencies sa miaging adlaw.Namahayag si PRO-10 spokesperson PMAJ Joan Navarro nga dako ang impact sa pagkadakop sa maong suspetsado ilabina sa kahimtangan sa kalinaw ug kahusay sa komunidad. Matod pa niya, ang suspetsado dugay nang nagtagotago sa nagkalain-laing lugar sa Pilipinas, hinungdan nga nagpabilin ang kahadlok ug kawalay hustisya sa pipila ka mga biktima.Sumala pa ni Navarro, ang maong hitabo nagpamatuod nga walay bisan kinsa ang labaw sa balaod sa Pilipinas bisan pa og molabay ang daghang tuig. Giingon niyang padayon ug walay hunong ang PNP sa pagpaningkamot aron masiguro ang hustisya alang sa mga biktima sa krimen.Nagpasalamat usab ang kapulisan sa tabang sa komunidad nga nahimong mata ug dalunggan sa awtoridad, nga maoy hinungdan sa pagtultol sa lokasyon sa suspetsado ug sa malampusong operasyon. (James Oliver)
