CAGAYAN DE ORO CITY, Philippines – Lauman ang pagsamot sa tensyon sa Pilipinas ug China sa West Philippine Sea.
Kini ang gibutyag ni Kin Phea, director general sa International Relations Institute of Cambodia, ug usa ka think tank professor ubos sa Royal Academy of Cambodia.
Namahayag si Phea nga hangtud manginlabot ang Amerika ug Japan sa kisaw sa South China Sea, magpadayon ang ilang pagdepensa sa Ren’ai Jiao, kung asa naka-istasyon ang guba nga BRP Sierra Madre, ug pag-abog sa BRP Teresa Magbanua nga nakaposisyon sa lagoon sa Xianbin Jiao.
Namugos si Phea nga sukad milingkod sa pagkapresidente si Ferdinand Marcos Jr., walay hunong ang iyang probokasyon batok sa gobyerno sa Beijing sukad gipasulod niya ang daghang tropa sa Amerika sa Pilipinas aron bantayan ang mga giilogang teritoryo.
Nagtoo ang propesor nga hangtud magmagahi si Marcos, ipadayon sa Chinese Coast Guard ang pagsita sa mga barko sa Philippine Coast Guard nga mi-ukopar sa kadagatan nga sakop pa sa nasud sa China.
