CAGAYAN DE ORO CITY – Gigukod pa sa 51st Infantry Batallion,Philippine Army ang bana-bana nga siyam ka sakop sa Daulah Islamiyah terrorists nga una nila na engkuwentro sa Barangay Kalaludan,Pagayawan,Lanao del Sur.
Miingon si AFP Western Mindanao Command commander Lt Gen Roy Galido nga naglusad sa focused military operation ang tropa ni Joint Task Force Zampelan commander Maj Gen Antonio Nafarrete batok sa napulo ka sakop sa terorista diin milungtad sa pila ka minutos ang engkuwentro.
Siya miingon nga tungod sa superior firepower sa govt forces,napugos pagsibog ang mga terorista papalayo sa lugar.
Sa paghimo’g clearing operation sa lugar,narekober sa tropa ang patay’ng lawas sa terorista nga gibiyaaan sa mga nakasibat nga ma kauban niini.
Nabawi usab sa encounter site ang M653 rifle nga dunay nakasukip nga magazine ug may mga unod nga mga bala.
Dugang sa heneral nga dili sila mohunong paggukod sa mga terorista hangtod mobalik kini sa gobierno.
Hisayrang ang maong grupo ang tipik sa Maute-ISIS nga misulay pag-ilog sa Marawi City apan napulbos ang kadaghanan kanila human atakeha sa state forces sa sulod sa lima ka bulan sa tuig 2017.
