CAGAYAN DE ORO CITY – Nakaabot na ang test cartridges nga gihulatan sa local health authorities aron maggamit na ang Reverse Transcription Polymerase Chain Reaction COVID-19 CONFIRMATORY TESTING sa duha ka ospital sa syudad.
Miingon si DoH-10 Infectious Diseases Cluster head Dr. Ian Gonzales nga nalangan ang shipment sa cartridges gumikan sa bagyong Ambo sa miaging semana.
Gibutyag usab niini nga mahidangat sa adlaw’ng Huwebes ang mga eksperto sa Research Institute for Tropical Medicine ug World Health Organization nga maoy mobansay sa 24 ka medical technologists nga moapil sa PCR training.
Kahinumduman nga nakadawat na’g license to operate ang Northern Mindanao Medical Center nga mohimo sa COVID-19 testing gamit ang GeneXpert PCR machine.
Samtang gilauman sa Department of Health DOH-Northern Mindanao ang pagsaka sa ihap sa mga magpositibo sa coronavirus disease sa rehiyon.
Kini kon masugdan na ang paggamit sa Reverse Transcription Polymerase Chain Reaction COVID-19 CONFIRMATORY TESTING sa duha ka ospital sa syudad.
Apan gibutyag ni Gonzales nga dili kini angayang kabalak-an ug kahadlukan tungod kay pinaagi sa maong testing, mapadali ang pagsumpo sa takod sa bayrus gumikan kay ilang mapaubos sa kwarantina ang magpositibo.
Ang duha ka PCR machines ang adunay kapas nga makahimo sa 100 tests matag adlaw diin moggawas ang resulta sulod sa 30 hangtud 45 minutos lamang.
