Gikompirmar sa anak ni dismissed congressman Arnolfo Teves Jr nga gikidnap sa wala mailang mga personalidad ang iyang amahan kuyog ang iyang Timorese Lawyer nga si João Serra.
Miingon si Axl Teves, anak sa pugante nga gironda sa dagkung mga lalakihan ang gipuy-ang balay sa iyang amahan sa Dili City.
Walay gipakita nga mga dokumento ang grupo busa gikonsiderar nila kining abduction. Una nang namahayag ang mga otoridad sa maong nasud, si Teves ug ang iyang abogado, gi-aresto sa Timor-Leste immigration police, human madawat ang report nga wala nay bili ang iyang pasaporte.
Gani, dili pa masuta sa Department of Justice (DOJ) sa Pilipinas kung unsa ang tukma nga aksyon sa korte sa Timor-Leste kung deportation o extradition ang ilang ipahamtang kang Teves.
Hisayran nga tuig 2023 pa nagtagu-tagu si Teves sa maong nasud sukad iya ang natumbok nga mastermind sa pagpatay kang Negros Oriental Governor Roel Degamo, ug mimasaker sa uban pang mga tawo sulod sa iyang compound sa Pamplona City.
Kasamtangang nag-atubang sa patong patong nga kasong murder si Teves.
