CAGAYAN DE ORO CITY – Giimbitar ni Regional Peace and Order Council chairman City Mayor Oscar Moreno ang mga aktibong rebeldeng NPA ug supporters niini nga ihunong na ang pakig-away sa gobierno ug pahimudsan ang mga progama nga alang kanila.
Gihimo ni Moreno ang pagdani dungan sa paglusad sa City Task Force to End Local Communist Armed Conflict o ELCAC sa Brgy Tignapoloan ning syudad.
Miingon si Moreno nga ang maong porgrama ang dili mogamit sa mga armas apan direkta nga pagtubag sa suliran nga gisagubang sa mga rebelde ilabina sa kalisdanan sa panginabuhian.
Misaksi sa maong kalihukan si Cabinet Officer for Regional Development and Security o CORDS chairman ug PCCO Sec Martin Andanar kuyog ang ubang ahensiya sa kagamhanan kagahapon sa buntag.
Samtang mihangyo usab si Cagayan de Oro 1s District Rep Rolando ‘Klarex’ Uy sa katawhan ug bisan sa rebeldeng NPA nga hingpit nang talikdan ang idolehiya sa CPP founder Jose Maria Sison nga ipahagba ang demokrasya ug ihulip ang komunismo.
Kini tungod kay ang maong ambisyon ang rason kon nganong nagkabahin-bahin ang katawhan resulta sa pag-alsa’g armas aron pakigbatukan ang kagamhanan.
Miingon si Uy nga anaa kanunay ang gobierno pagtabang sa katawhan rason nga dili angay usikan apan pahimudsan.
Gihimo sa kongresista ang apelasyon dungan sa pagtambong usab niini sa paglusad sa City Task Force to End Local Communist Armed Conflict o ELCAC sa Brgy Tignapoloan sa syudad kagahapon sa buntag.
