CAGAYAN DE ORO CITY-Gusto sa internally displaced persons o IDPs madungog kang Pres Rodrigo Duterte ang tinud-anay nga plano sa rehabilitasyon sa Marawi City.
Kini nunot sa ikatulong State of the Nation Address o SONA ni Duterte sa Batasang Pambansa sa kauluhan sa adlaw’ng Lunes sa hapon.
Gibutyag ni ARMM 1st District Assemblyman Zia Alonto Adiong nga gusto nila mabati kang Duterte ang aksyon nga himoon batok na sa sunod-sunod nga pagkalangan sa rehabilitasyon sa most affected area o MAA.
Miingon si Adiong nga gusto usab nila mabati kang Duterte ang pagtuki sa pederalismo ug Bangsamoro Basic Law o BBL nga mahisgutan sa iyang SONA sunod semana.
Sayran nga nawad-an na’g gana ug kaikag ang ubay-ubay’ng mga Maranao Muslim ug ubang tribu bisan napasar na ang BBL sa kongreso.
Kini bisan nga pirmahanan na ni Pres Duterte ang BBL mismo sa ikatulo nga SONA sa kauluhan.
Miingon si Assemblyman Adiong nga daghang importanteng probisyon ang nawala sa napasar nga BBL.
Hinoon, nalipay na gihapon ang katawhan nga wala undangi sa gobierno ug MILF nga maporma ang taliabot nga Bangsamoro Autonomous Region in Muslim Mindanao o BARMM govt.
