CAGAYAN DE ORO CITY -Patay ang grade 8 student human malayatan ang ulo sa ten-wheeler truck diha sa dalan Gaabucayan, Extension ning syudad.Giila ang namatay nga si Bernald Carahasan, 15-anyos ug residente sa St.John Brgy Puntod ning syudad.
Sumala sa drayber sa truck nga si Allan Glamayo, 29-anyos ug residente sa Ilaya, Brgy Carmen ning syudad nga gikawat sa biktima ang maso sa sakyanan samtang nagdagan.
Apan tungod sa kabug-at sa maso nahulog ang biktima hinungdan nga naligsan ang ulo niini nga hinungdan sa iyang kamatayon.
Detinado sa Agora Police Station ang drayber sa truck ug nag-atubang sa kasong reckless imprudence resulting to homicide sa piskalya ning syudad.
Samtang giangkon sa inahan sa biktima nga si Inday Carahasan nga mahilig magkabit sa sakyanan ang iyang anak nga nalatayan sa ten-wheeler truck diha sa Gaabucayan Extension ning syudad.
Apan gipanghimakak sa inahan ang alegasyon nga nangawat sa maso ang iyang anak hinungdan nga nalatayan-patay sa truck.
Si Carahasan miingon nga wala niya gipatungha ang iyang anak tungod kay bag-o lang nila kini gikasab-an tungod sa kanunay pag-absent sa klase aron pagkabit-kabit sa mga sakyanan.
Hisayran nga dead -on the spot ang biktima human mapigsat ang iyang ulo dihang nalatayan sa ligid sa truck.
