CAGAYAN DE ORO CITY- Masub-anon ang outing ug farewell party sa mga tinun-an sa high school dept sa Pilgrim Christian College o PCC sa dalang Capistrano-Tiano Brothers ning syudad.
Kini human nalumos-patay ang usa sa mga tinun-an sa maong tunghaan samtang naligo sa pribadong Six Angels beach resort sa Brgy Bayabas sa dakbayan kagahapon sa buntag.
Nalatid sa report nga giila ang biktima nga si Wesley Remalig,12 anyos nga lumad nagpuyo sa lungsod sa Magsaysay,Misamis Oriental.
Padulong na manguli ang mga tinun-an kuyog ang ilang maestra nga si Cheska Mae Madrona dihang wala nila makita si Remalig.
Gilayong gipangita ang biktima apan wala na’y kinabuhi si Remalig nga nadala sa pribadong ospital ning syudad.
Sa pagkakaron,wala pa’y gipagawas nga pahayag ang maong tunghaan kabahin sa gidangatan sa biktima.
Sulod ning semana,laing duha usab ka bata ang nalumos-patay diha sa Brgy Tablon ug Brgy Cugman sa syudad.
