CAGAYAN DE ORO CITY-Nabawi sa kapolisan ang sais gramos nga shabu ang nakuha sa kapolisan sa panimalay sa usa ka Tokhang surrenderee diha sa Sitio Bayanga, Barangay Lumbia ning syudad.
Giila ni S/Insp Dennis Ebsolo, hepe sa Lumbia Police Station ang suspek nga si John Alexis Perin alyas Ali, 36-anyos ug residente sa maong dapit.
Pinasikad sa search warrant nga giisyu ni RTC Branch 18 Executive Judge Dennis Alcantar nga narekober sa mga pulis ang 6 ka gramos sa drugang shabu, .45 kalibre nga armas ug 4 ka buhing bala ingon man 22 ka mga bala sa .9mm pistol sa panimalay sa suspek.
Giakusahan sa pamilyang Perin ang Lumbia Police Station nga gi-plantingan sa drugang shabu ug armas ang suspek nga si Perin.
Sumala sa asawa sa suspek nga si Daisy Perin nga dili tinood nga nagbaton sa drugang shabu ug .45 nga kalibre sa armas ang iyang bana.
Giangkon ni Gng Perin nga tiggamitan sa droga ang iyang bana apan dugay na kini nga miundang sa maong bisyu sukad mipaubos sa Oplan Tokhang.
