CAGAYAN DE ORO CITY – Nasikop ang suspek nga ngilngig mipatay sa tomboy nga kahera sa gasoline station sa Gaabucayan Streets ning syudad.
Kini human unang na missing ang biktima sulod sa lima ka adlaw nga si Rachel Manahan,32 anyos ug residente sa maong lugar.
Namahayag si Macabalan Police Station commander Police Capt Jack Llaneta nga maoy gitumbok nila nga suspek ang basurero nga si Daniel Bagabaldo,42 anyos ug lumad taga-Salay,Misamis Oriental.
Nakita sa video footage kon giunsa sa suspek ang pagdagmal sa biktima samtang sakay sa gimanehong bisekleta gikan trabaho ug pauli na unta niadtong Hulyo 22 sa gabii.
Dugang ni Llaneta nga dako ang posibilidad nga gilugos una ang biktima ayha gipatay ug gitaguan sa septic tank sa pribadong yuta sa maong lugar.
Nasapon lamang ang suspek dihang wala hunungi sa kapolisan ug kabanay sa biktima nga makit-an kini kinsa nagtago duol ra usab sa crime scene kagahapon sa buntag.
