CAGAYAN DE ORO CITY – Pinangita usab daw sa gobierno sa Tsina ang negosyanteng Intsek nga si Yang Jian Xin nga nagtakuban sa pangalang Pinoy nga si Antonio Mahestrado Lim alyas Tony Yang nga dagha’g mga negosyo dinhi sa syudad.
Kini ang gibutyag ni Senadora Risa Hontiveros,chairperson sa committtee on Women, Children, Family Relations and Gender Equality sa senado dihang nahisgutan ang isyu sa Philippine Offshore Gaming Operations o POGO sa ilang pagbisita sa dakbayan kagahapong adlawa.
Miingon si Hontiveros nga dako’g tabang ang nakuha nila nga dugang impormasyon kabahin kang Yang kinsa kanhi renter sa Alwana Business Center diin nag-operate ang iyang POGO ug ang pagpanag-iya niini sa Philippine Sanjia Steel Corporation sa PHIVIDEC Industrial Authority sa Tagoloan,Misamis Oriental.
Ipadayon sa komitiba sa senadora ang pagdungog sa POGO issue nga sentro ang kalambigitan ni kanhi Bamban Mayor Alice Guo nga giingong ka-transaksyon usab ni Yang.
