CAGAYAN DE ORO CITY – Balhog sa prisohan ang duha ka gitoohang dagkong opisyal sa New Peoples Army nga nakabase sa Purok 1, Brgy Kalasungay, Malaybalay City, Bukidnon.
Gibutyag ni Police Lt Col. Jerry Tambis, hepe sa Malaybalay City Police Station nga giila ang mga suspek nga nasikop pinaagi sa search warrants nga sila si Lorna Micabalo, 65 anyos,dalaga nga residente sa maong syudad ug Jean Montemayor,20 anyos nga lumad taga-North Cotabato.
Miingon si Tambis nga si Micabalo kinsa nagbaton sa pito ka alyas ang nagsilbing kalihim sa Sub-Regional Committee-4 sa North Central Mindanao Regional Committee ug nagbaton sa mga kasong murder,frustrated murder,attempted murder,robbery with homicide & frustrated homicde,kidnapping and serious illegal detention ug rebellion sa unom ka korte sa Northern Mindanao ug Butuan City.
Samtang si Montemayor kinsa kuyog ni Micabalo ang giingong nakuhaan usab sa mga eksplosibo ang nagsilbi nga secretary sa Guerilla Front 68 B sa NCRMC sa kalihukang CPP-NPA.
Sa pagkutlo ning balita,wala pa’y komento ang armadong pundok kabahin sa gidangatan sa ilang giingong mga kauban.
