Angayan lang maleksyon si Senate Presidente Vicente Sotto III sa iyang mga iresponsabli nga mga pahayag batok sa mga mahistrado sa Korte Suprema.
Gihimo ni Atty Ferdinand Topacio ang pahayag human nabati nila ang bastos nga komentaryo ni Sotto batok sa mga mahistrado sa Korte Suprema.
Gumikan niini, ang mga abogado nga sila Atty. Ferdinand Topacio, kauban nila Atty. Manuelito Luna ug Atty. Harold Respicio, misang-at sa petition for indirect contempt sa Korte Suprema batok Sotto sa SC.
Ang ilang reklamo nagsugod sa mga pahayag ni Sotto nga mibatikos sa desisyon sa Korte Suprema sa pagdeklarar nga unconstitutional ang impeachment complaint batok kang Vice President Sara Duterte.
Matod pa ni Topacio, ang mga pulong ni Sotto mitipas na sa “legitimate commentary” ug nakadaot sa kredibilidad sa Korte Suprema sa mata sa publiko.
Pananglitan niini ang pag-ingon ni Sotto nga mas maalam pa ang usa ka first-year law student inay sa mga mahistrado sa Korte Suprema.
Gipadayag usab sa senador nga wala masabti ni Senior Associate Justice Marvic Leonen ang Konstitusyon.
Alang kang Topacio, kini nga mga pulong nakalapas sa respeto sa hudikatura.
Hinoon, gitin-aw sa abogado nga wala sila magtumong nga ipahilom si Sotto apan, gusto nila masabtan sa presidente sa senado ang iyang limitasyon busa angayan lang nga siya i-contempt.
=
