CAGAYAN DE ORO CITY-Kumaripas diretso sa kanal ang isang RTMI Bus at bumangga naman sa gilid ng daan ang trailer truck sa nangyaring aksidente sa Barangay Dalwangan Malaybalay City, Bukidnon.
Sinabi ni Malaybalay City Police Station investigator Senior Master Sgt. Cyril Tanquion na nawalan ng kontrol si Eric Ino, 32, nakatira sa New Matina Davao City sa kanyang minamanehong Trailler truck kung kaya’t napunta sa kabilang linya ng kalsada.
Bigla namang umiwas ang kasalubong na Bus na minamaneho naman ni Jonathan Salodar, 40, residente ng Poblacion Quezon, Bukidnon at dumeretso sa kanal.
Agad namang isinogod sa ospital ang apat na pasahero ng bus ngunit ipinalabas din ito ng doktor dahil minor lamang ang kanilang natamong injury.
Ayon kay Tanquion, accident prone area talaga ang lugar kung saan nangyari ang insidente dahil sa paliko-liko nitong daan at madulas pa.
Nakatakda namang sumailalim sa amicable settlement ang bawat kampo.
