CAGAYAN DE ORO CITY – Kasuhan sa tulo ka sumbong-kriminal sa kapolisan ang drayber sa prime mover truck nga gibanggaan sa UV Express sa kurbadahon nga bahin sa Purok 7,Carmen hills,Upper Puerto ning syudad.
Kini bisan kung dili atraso sa drayber nga si Arnold Celestiano,45 anyos nga taga-Brgy Damilag,Manolo Fortich,Bukidnon ang dugu-ong bangga nga gikamatay sa duha ka tawo nga sakay sa van kagahapon sa buntag.
Giila ni Police Chief Master Sgt Ryan Sevilleno,imbestigador sa traffic enforcement unit sa Puerto Police Station ang mga namatay nga sila Elem Mae Rojas,driver sa van ug ang agalon niini nga si Jiven Magriña nga pulos taga-Gitagum ning lalawigan.
Subay sa nakuha nga impormasyon ni Sevilleno kang Celestiano nga misulod sa road lane nga iyang gisubay ang van ug pugsanon pa niya nga likayan apan wala na kini makaya hinungdan sa dugu-ong aksidente.
Nahiagom sa grabeng mga samad ug bun-og ang mga biktima hinungdan sa hinanali nila nga kamatayon.
Kutob na lang sa pagpangayo’g pasaylo ang detinadong drayber kay gihimo niya ang tanan makalikay sa van apan mibangga kini kaniya resulta sa aksidente.
Detinado si Celestiano samtang naghulat sa posibleng ammicable settlement gikan sa pamilya sa mga biktima aron kalikayan mabilanggo.
