(Update) CAGAYAN DE ORO CITY – Ipasaka sa kapolisan ang kasong reckless imprudence resulting to multiple physical injuries ug damage property batok sa trailer truck driver sa prosecutor’s office ning syudad karong adlawa.
Kini subay sa sulti ni Police Staff Sgt Argie Luarenciana,imbestigador sa Magsaysay Police Station sa hitabo.
Gibutyag ni Laurenciana nga dili na mag-atubang sa kasong reckless imprudence resulting to homicide ang trak-driver nga si Arniel Alegarbies nga taga-San Francisco,Agusan del Sur kay misulod na sa kasabutan ang mga tagtungod sa mga namatyan ug ang agalon niini.
Unang giila ang mga namatay nga lulan sa Toyota Hi Ace van nga sila Joffrey Villanueva,taga-Maasin,Iloilo Province; Jan Mark Cabaya,taga-Agusan del Sur ug Tara Angela Dael,17 anyos.
Samtang ang mga samaron naglakip sa mismong driver sa van nga si Jerry Abella Gaviola,taga-San Miguel,Bulacan nga aktibong miembro sa Philippine Army Scout Ranger;iyang kapikas nga si Lorie Gaviola ingon man ang ilang duha ka gagmay’ng anak ug laing 17 anyos nga babaye nga kakuyog gihapon nila sa biyahe.
Dumduman nga padulong sa Butuan City gikan sa Gingoog City ang mga biktima dihang pag-abot nila sa hihgway sa Barangay Consuelo,Magsaysay gikabangga nila ang trak nga kargado sa bulldozer sa Biyernes sa gabii.
Hisayrang dead on the spot ang tulo ka pasahero samtang magkalahi nga ospital gipangdala ang mga samaron ilabina ang van driver ug usa ka Hannah kay grabe ang naangkon nila nga mga damyos.
