CAGAYAN DE ORO CITY – Gisunog sa bana-bana 30 ka sakop sa rebeldeng New People’s Army o NPA ang duha ka sakyanan nga gipanag-iya sa mga negosyante sa quarry area sa Purok 6,Brgy Sinabuagan,Valencia City,Bukidnon.
Kabahin sa gisunog ang trak nga gipanag-iya sa kanhi govt official samtang ang payloader ang iya usab ni Saturnino Singkol nga pulos nagpuyo sa maong lugar.
Miingon si Lt Col Surki Serenias,hepe sa Valencia City Police Office nga migamit sa mga batan-ong lumad ang mga rebelde aron sunugon ang maong mga kagamitan.
Dugang ni Serenias nga ubay–ubay’ng kasong kriminal ang ipasaka sa mga biktima batok sa mga rebelde nga mihimo sa maong kremin sa miaging gabii.
Samtang giakusahan sa militar nga pagpangilkil ang motibo sa rebeldeng NPA kon nganong gisunog ang truck ug payloader sa mga negosyante sa quarry compound sa Purok 6,Brgy Sinabuagan,Valencia City,Bukidnon.
Miingon si 403rd IB commander Lt Col Ferdinand Barandon nga tungod sa pagdumili paghatag sa revolutionary tax sa mga biktima nahukman sa mga rebelde nga sunugon ang maong kagamitan.
Gipasalig ni Barandon nga tabangan nila ang mga biktima ug PNP aron mapalig-on ang mga kaso nga ipasaka batok mga suspek sa piskalya sa Bukidnon ning semanaha.
