CAGAYAN DE ORO CITY – Gibulgar sa grupong United Drivers Association o UNIDA nga ubay-ubay’ng personalidad ang nabulahan ug nakasapi sa gihingusgan nga transport modernization program sa nasud.
Kini human gibulgar ni UNIDA President Joel Gabatan sa interbyu sa Bombo Radyo nga anaa sa 50 hangtod P400-mil pesos ang gadawaton sa transport cooperatives gikan sa ‘made in China’ bus suppliers bugti sa franchise consolidation.
Namahayag si Gabatan pinaagi sa pagpalit sa wala niya panganli nga transport cooperatives sa bus units nga mugna gikan sa China,dunay bugti usab niini nga dakong kantidad sa salapi.
Kini ang rason nga daghan transport groups nga nagpa-konsolidar sa ilang prangkisa gawas sa pag-obligar kanila sa kagamhanan paghimo niini.
Samtang wala pa’y bisan usa ka kooperatiba sa transportasyon ang mitumpang sa eksposi ni Gabatan kon matood ang maong impormasyon.
Una nang gihingusgan sa gobierno nga pulihan sa pro-environmental transport units ang mga karaang passenger jeepneys sa Pilipinas rason gitahasan ang Dept of Transportation nga pugsanong gipatuman ang modernization program.
Dumduman nga kutob ra sa Mayo 16 ang franchise consolidation sa tanang traditional jeepneys ug mga pagpangdakop na ang himoon sa traffic enforcers batok sa mga masapon nga pabiling modagan aron mohimo’g pagpamasahero.
Hisayrang ang Francisco Motor Corporations ang nagbinugtong nga local manufacturer sa jeepney design nga wala mobiya sa ilang klase sa mga sakyanan kay indikasyon kini nga iya sa Pilipinas taliwala sa naghinobrang modernized bus units palibot sa nasud.
