Gihagit ni Jaime Aguilar, spokesperson sa NCTU, ang gobyerno nga palig-onon pa ang mga lakang aron matubag ang kasamtangang krisis nga giatubang sa katawhan.
Sumala kaniya, aduna man untay igo nga pondo ang nasud, apan kasagaran kini mapunta sa korapsyon, hinungdan nga dili epektibo ang paghatag sa gobyerno og solusyon sa mga krisis.
Sa iyang interbyu sa Bombo Radyo, gipasabot ni Aguilar nga dili pa sila kontento sa kasamtangang ayuda gikan sa gobyerno tungod kay kulang pa kini aron matabangan ang mga apektadong sektor.Dugang pa niya nga kinahanglan paminawon sa gobyerno ang ilang mga panukala, sama sa pagpabalik ug pagpalapad sa service contracting aron masiguro nga adunay kita ang mga drayber.
Si Aguilar miingon nga sa karong panahona mas maayo unahon sa gobyerno ang mga solusyon nga long-term ug adunay lig-on nga sistema, imbes nga one-time subsidy lang sama sa ayuda. (By James Oliver)
