CAGAYAN DE ORO CITY-Iduso sa transport sector ang petisyon aron usbawan ang pletihan sa public utility vehicles o PUVs sa LTFRB-10 ning syudad.
Kini aron hangyo-on ang gobierno nga tugtan sila makapangayo’g gamay’ng usbaw sa pletihan gikan sa mga sumasakay sa syudad.
Gibutyag ni Ringo Lago, secretary general sa STAREX-Piston Northern Mindanao nga mihangyo sila nga mahimong 8 pesos ang minimum nga pletehan sa mga pasahero aron makatabang usab sa ilang kalisod.
Gitumbok ni Lago nga kabahin sa nakapasamot sa kalbaryo sa mga PUJ operator ug drivers ang implementasyon sa tax package o TRAIN Law nga mi-epekto ning panahona.
Nasayran nga magtigom ang sila Lago kauban ang The National Confederation of Transport Union o NCTU ug Transport Federation of Cagayan de Oro o TRAFECO alang sa maong katuyuan ning syudad sunod semana.
Samtang dili magpanuko pagtugot ang LTFRB-10 sa transport group nga mahatag ang gipangayo nila nga usbaw sa pletihan.
Kini ilabina kon makumbinsir ang gobierno nga angay lamang usbawan ang minimum nga pletihan sa mga pang-pasahero nga jeep tungod sa bug-at nga mga rason.
Miingon si LTFRB regional director Allan Guro nga dili usab sila mohatag pagtugot kon pabiling makalahutay pa ang kinitaan sa mga operator ug driver sa mga pamasada niini.
