CAGAYAN DE ORO CITY- Ipatawag ni LTFRB regional director Allan Guro ang mga operator nga miduyog sa undang-pasada sa syudad ug ubang bahin sa rehiyon kagahapong adlawa.
Kini aron pangayua’g tubag kon nganong dili sila angay silotahan sa pagbalda sa transportasyon nga naka-perhisyo sa publiko.
Namugos si Guro nga maayo ang tuyo sa pag-moderno sa mga jeep ug walay disbintaha alang niini sa mga operator ug driver.
Samtang nawala ang 15 porsiento nga kinitaan sa mga negosyante tungod sa nationwide transport strike sa syudad kagahapong adlawa.
Kini human angkona ni Oro Chamber of Commerce Pres Roberto Pizarro nga nakuratan sila ug wala kapangandam sa maong kalihukan.
Miingon si Pizarro nga daghang nanawag kaniya nga mga miembro aron mopahibalo nga apektado ang ilang mga transaction.
Mismo usab si Pizarro ang uyon nga bag-uhon na ang mga sakayanang pasayruhan aron dili mabutang sa peligro ang mga pasahero niini.
Sa pikas bahin,misamot pagtapun-og ang apason nga trabaho sa mga empleyado sa city hall ning adlawa.Kini human wala nila malihok kay nag-suspenso sa trabaho subay sa mando ni Pres Rodrigo Duterte alayon sa nationwide transport strike.
Gibutyag ni City Administrator Dionne Gersana nga daghang meeting ang kanselado tungod kay walay trabaho hangtod ning adlawa.
Hinoon,gipasalig niini nga maatiman gihapon nila sa ensakto ang mga kliyente ilabina ang mga mobayad sa buluhisan nga wala mahatagi’g pagtagad sa city hall kagahapong adlawa
.Samtang,generally peaceful ang unang adlaw sa “two-day-nationwide transport strike” nga gipaluyuhan sa STAREX-PISTON.
Gibutyag sa ni C/Insp Mardy Hortillosa,tigpamaba sa Cagayan de Oro City Police Office wala silay natala kagubot kalabot na sa gipahigayong lihok protesta itandi sa mga mga nanglabay nga panahon.
Gikompirmar ni Hortillosa ang unang report sa RTA nga wala sila’y natalang kaso sa pagpanuyak sa mga sakyan sulod sa 80 ka brgy ning syudad.
Sa gihapon, gipa-alerto sa PNP ang tanan nilang checkpoint areas batok sa mga posibleng pundok nga mosakay sa panahon.
