CAGAYAN DE ORO CITY-Gilusad sa grupong STAREX PISTON Northern Mindanao ang transport pahulay ning adlawa.
Miingon si STAREX-Piston Northern Mindanao Sec Gen Ringo Lago nga 50 porsiento nga naparalisar ang trapiko sa lima ka dagkong area sa Amihang Mindanao.
Ang transport strike mahitabo dinhi sa syudad, sa Iligan, Gingoog, Misamis Oriental ug sa Bukidnon.
Base sa pamahayag ni Lago sa Media, gusto matud pa nilang ipabati sa gobyerno ni Duterte nga sangko sa langit ang ilang kalagot sa gipatumang “murder-nazation program”.
Namugos si Lago nga hinay hinay na silang gihukasan sa ilang panginabuhian kay dili na mapadagan sa dalan ang mga karaang sakyanan ug mapugos sila’g palit sa mga E-jeep nga iya sa mga dagkung kapitalista.
Samtang,gisaway sa Cagayan de Oro City Police Office o COCPO ang gilusad nga transport pahulay sa grupong STAREX-PISTON Northern Mindanao sa syudad.
Kini human naghatag lamang sa perhisyo sa seguridad sa dakbayan ilabina mismo sa mga naghimo’g transport pahulay nga wala magbaton sa permit sa ilang kalihukan.
Gihimo ni COCPO spokesperson Supt Mardi Hortillosa ang komento tungod sa nationwide transport strike diin balik-balik ang panawagan nga supakon ang pag-phaseout sa karaang mga sakyanan.
Hinoon,dili mabati ang pagka-paralisar sa trapiko sa syudad ug lalawigan ning adlawa.
