Gipadayag sa PONTRANSCO nga padayon nilang gibati ang kalisod sa operasyon tungod sa pagsaka sa presyo sa lana samtang nagpaabot gihapon sila sa fuel subsidy ug sa desisyon sa gobyerno kabahin sa ilang petisyon sa pagtaas sa pasahe.
Sa interbyu sa Bombo Radyo, miingon si PONTRANSCO President Luzminda Escobidal nga nasabtan na sa pipila ka pasahero ang kahimtang sa sektor sa transportasyon, ilabina nga klaro usab sa publiko ang pagsaka sa presyo sa mga materyales ug lana nga gigamit sa mga drayber ug operators sa ilang adlaw-adlaw nga biyahe.
Bisan pa niini, gipasabot ni Escobidal nga dili sila basta-basta makapataas sa pasahe tungod kay kinahanglan pa kini og aprubal gikan sa Land Transportation Franchising and Regulatory Board.
Matod pa niya, samtang wala pa’y pinal nga desisyon ang LTFRB sa ilang petisyon sa fare increase, magpadayon lang sa paghulat ang ilang grupo ug mosunod sa kasamtangang regulasyon sa gobyerno aron malikayan ang paglapas sa balaod sa transportasyon.
Gidugang pa ni Escobidal nga naglaum ang ilang organisasyon nga matubag sa gobyerno ang ilang panawagan, ilabina sa paghatag og fuel subsidy, aron matabangan ang mga drayber ug operators nga naglisod na sa pagpadagan sa ilang mga sakyanan tungod sa padayon nga pagsaka sa gasto sa operasyon. (By James Oliver)
