CAGAYAN DE ORO CITY – Kusganon nang ipatuman sa task force nga tinukod sa city hall ang pagpangdakop sa mga bau-bao nga tigbiyahian pasulod ug paggawas dinhi sa syudad.
Miingon si RTA manager Engr. Nonito Oclarit Jr nga basi kini sa kamanduan sa DILG memorandum circular 2020-036 ug Letter of Instruction gikan sa Land Transportation Office nga nagdili sa tricabs nga moagi sa national highways ug mopasakay sa mga pasahero tungod sa kadilikado.
Una niini,dugay nang gi-reklamo sa mga drayber sa mga pasayruhang jeep,taxi ingon man motorela ug angkas ang pagkaylap sa mga bau-bao kay giingong naka-apektar sa ilang kinitaan sa pamasada.
Samtang gikuwestiyon Kag. James Judith ang DILG memorandum circular 2020- 036 ug Letter of Instruction sa Land Transporation Office kabahin sa pagdili makabiyahe sa national highways sa mga bau-bao nga dugay nang isyu dinhi sa dakbayan.
Miingon si Judith nga wala magkasinabot ang direksyon sa maong mga kamanduan sa LTO ug DILG pag-abot sa isyu sa tricab.
Kini ang rason nga giaghat sa konsehal ang mga tag-iya sa mga bau-bao nga maghiusa aron moduso’g declaratory relief sa korte batok sa maong mga mando.
Sa pikas bahin,wala did-i ang katawhan nga mopalit sa mga bau-bao subay sa kaugalingon nila nga katuyuan sa pagbaton niini.
Kini usab ang pagtin-aw ni Regulatory and Complaint Board chairman Atty Edgardo ‘Egay’ Uy kinsa miembro sa task force kabahin sa pagkuwestiyon sa konseho sa ilang lakang nga pagpangdakop sa tricabs nga nagbiyahe ning syudad.
Miingon si Uy nga walay balaod nga nagdili sa mga negosyante nga pugngan sila mobaligya sa tricabs sa publiko apan angayang dumdumon sa mahimo nila nga customers nga wala pa’y balaod nga nagtugod kanila aron libre sila pagbiyahe sa national highways ilabina dinhi sa dakbayan.
