CAGAYAN DE ORO CITY-Atubangon sa truck driver ang patung-patong nga kasong kriminal sa provincial prosecutor’s office sa syudad ning semanaha.
Kini human namatay ang tulo ka tawo samtang laing usa ang kritikal sa panagbangga sa cargo truck ug motorsiklo sa Brgy Sugbongcogon,Tagoloan,Misamis Oriental kagahapon sa kadlawon.
Miingon si Tagoloan Police Station deputy commander Sr/Insp Allan Oniana nga maoy kasuhan si Juri Saberon nga taga-Poblacion,Valencia City,Bukidnon.
Namatay sa aksidente ang mismong driver sa motorsiklo nga si Reden Magdadaro,23 anyos nga taga-Brgy Agusan;backrides nga sila Alisa Rose Fuentes ug Angel Tablan nga pulos menor de edad.
Mibangga ang motorsiklo sa luyo nga bahin sa cargo truck hinungdan nga nalagpot si Shanna Mae Valencia nga kritikal sa Northern Mindanao Medical Center.
