CAGAYAN DE ORO CITY – Kon mapatud-ang guilty sa korte, sigurado nga ma-priso sulod sa 3 hangtud sa 7 ka tuig ug magbayad pa sa monetary fine nga dili mu-minus sa P500,000 ang usa ka truck driver nga mipakatag sa mga sensitibong hulagway sa iyang kanhi hinigugmang babaye.
Giila ni Patrolwoman Jenel An Duapa,imbestigador sa Regional Anti-Cybercrime Unit 10 ang suspek nga si Rene Labares Alcantara,45 anyos,minyo nga taga-Igpit,Opol,Misamis Oriental.
Gibutyag ni Duapa nga nadakpan si Alcantara pinaagi sa entrapment operation gumikan sa reklamo sa iyang kanhi hinigugma nga gi-post niini ang sensitibong bahin sa lawas sa social media.
Nakumpiskar gikan sa suspek ang celphone diin makita ang sexual video sa biktima nunot sa operasyon sa usa ka food chain sa Brgy Gusa kagabii.
Kasong paglapas sa Republic Act 9995 o mas nailang Anti-Photo and Video Voyeurism Act of 2009 ang atubangon sa piskalya sa suspek ning adlawa.
