Gilayon nga giatiman ug gitiketan sa RTA ang driver sa usa ka 40-footer tractor mover nga nadaot sa utlanan sa Bugo ug Tagoloan sa miaging adlaw aron mapugngan ang grabeng kahuot sa trapiko taliwala sa pagsugod sa Vice Mayors’ League National Convention.
Giyagyag ni RTA Department Manager Benedicto “Doy” Ramiro nga nagtakilid ang maong truck tungod sa kargang duha ka container van, hinungdan nga dali kining gi-deployan og mga barrier ug Motorcycle Response Team aron malikayan ang dugang nga perwisyo.
Gisulti sa opisyal nga gipaspasan ang pagbalhin sa mga karga gamit ang duha ka forklift aron maseguro nga hapsay ang agianan sa mga opisyal ug delegado nga nagsubay sa maong ruta.
Hinoon, gipahayag ni Ramiro nga hingpit nga nahawan ang maong balda sa dalan sa udto pinaagi sa paspas nga koordinasyon sa mga awtoridad.
