CAGAYAN DE ORO CITY, Philippines – Namumpa na isip ika-47 nga presidente si Donald Trump, sulod sa US Capitol, ning adlawa.
Sa iyang unang presidential-inagural speech, iyang gideklarar ubos sa gahum sa Executive Order ang National Day of Liberation nga isaulog sa Enero 20.
Sugod ning adlawa, iyang gideklarar ang National Emergency sa South Border ug bubuan sa igong ihap sa mga sundalo aron dili makasulod sa ilang utlanan ang mga ilegal migrants gikan sa Mexico ug uban kanasuran.
Tipik niini ang pagbungkag sa tanan criminal gangs ug cartel nga naglihok sa Amerika ug gimando nga tawgon silang mga Terrorista.
Epektibo, sa iyang paglingkod sa White House duha ra ka klase sa tawo ang ilhon ni Trump, ug kini mao ang Babaye ug Lalaki.
Iyang gimanduan ang mga kongresista nga sumpoon ang Inflation rate crisis pinaagi sa pagpataas sa taripa sa tanan imported products nga musulod sa ilang merkado ug kunhuran ang naghinobra ka mahal nga presyo sa batakang palaliton, lana, ug mga serbisyo.
Gilangkat ni Trump ang Government Censorship ug gisaad nga mapatuman ang free speech.
Gawas niini, iyang gimando nga dili himoong basehan ang kolor sa paghatag promosyon sa rango ug gisaad nga mahimong “color blind” ang iyang administrasyon.
Gawas niini, gi-ambisyon ni Trump nga mapakayag ang bandila sa Amerika sa planetang Mars.
Sa katapusan, giila ni Trump ang iyang administrasyon isip “peacemaker ug unifier” tungod sa napatuman nga temporary ceasefire sa kapin duha ka tuig nga gubat sa Gaza ug Israel.
Sama sa gisaad, miabot lamang sa dul-an 30 minutos ang iyang inagural speech.
