CAGAYAN DE ORO CITY – Nakuha’g balik ni former US Pres Donald Trump ang kontrol sa White House sa Estados Unidos.
Kini human siya midaug pagka-presidente batok incumbent US Vice Pres Kamara Harris sa bag-uhay lang natapos nga piliay sa Amerika ning adlawa.
Gikan sa 538 ka electoral votes nga nakabase sa 52 ka estado, 277 niini ang nakuha ni Trump samtang si Harris ang nagbaton lang sa 226 nga sinyales nga maputol na ang kontrol sa partido Democrats sa White House.
Unang giilogan sa duruha ka kandidato ang pito ka swing states nga gilakipan sa Arizona,Georgia,Michigan,Nevada,North Coralina,Pennsylvania ug Wisconsin nga kanhi gidominar ni US Pres Joe Biden sa 2020 elections sa Amerika.
Magsilbi kining pinakauna sa kasaysayan sa US elections nga nakabalik ang kanhi presidente nga unang gipukan ni Biden sa iyang re-election sa tuig 2020.
Ikaduha usab kini nga higayon nga gipildi ni Trump ang babayeng kandidato gikan sa partido Democrats nga unang nahiaguman ni former US secretary of state Hillary Clinton sa tuig 2016.
Hisayrang pinakauna kining higayon usab nga adunay napili nga presidente sa Amerika nga nag-atubang sa daghang kaso sa upat ka tuig nga pagkawala niya sa puwesto.
