Gilusad karon sa mga progresibong grupo ang “Trump Out Campaign” aron supakon ang gipaabot nga pagbisita ni US President Donald Trump sa nasud karong bulana.
Gisulti ni Bagong Alyansang Makabayan Spokesperson Teddy Casiño nga ang maong lihok kontra usab sa gitanyag nga Pax Silica ug sa padayong pagdaghan sa mga sundalo ug military base sa Amerika dinhi sa Pilipinas.
Gitudlo sa opisyal nga ang pagbutang og mga missile system ug mga pasilidad sa US maoy nag-guyod sa nasud sa giyera batok sa China nga nagdala og pag-mahal sa lana ug sa mga baligya sa merkado.
Tungod niini, nanawagan ang grupo sa katawhan nga babagan ang pag-abot sa presidente sa Amerika ug ang pagsulod sa militar sa ubang nasud.
