CAGAYAN DE ORO CITY, Philippines – Muhimog kasaysayan si incoming US President Donald Trump sa iyang pagpanumpa isip ika-47 presidente sa Amerika. Ugma, Enero 20, sa Estados Unidos, himoon ang “indoor” nga pagpanumpa ni Trump sa US Capitol Rotunda, imbis sa gawas, tungod sa katugnaw sa temperatura sa gawas sa White House. Kini nga pagpanumpa mahisama sa nahitabo 40 ka tuig na ang milabay, panahon sa paglingkod ni kanhi US Presidente Ronald Reagan sa tuig 1985, diin mas paborabli alang kaniya nga mamumpa sulod sa US Capitol.
Sa maong adlaw, ubay-ubay nga mga tradisyon ang mabuak. Pito ka mga world leaders ang gi-imbitar ni Trump, busa mahimo usab kining international affair. Gibana-bana nga 500,000 ka guests ang motambong, wala pay labot niini ang mga lokal nga katawhan sa Estados Unidos nga musaksi sa mga parada. Human sa inagurasyon, mupahigayon ang bag-ong administrasyon sa engranding musical, ballroom party, military parade, ug fireworks display.
Sa dili pa manumpa si Trump, nakahan-ay na ang iyang itinerary. Gikan sa White House, gitakda kining musimba sa St. John’s Episcopal Church sa Lafayette Park. Ang incoming First Lady nga si Melania Trump maoy musugat nila outgoing President Joe Biden ug First Lady Jill sa White House alang sa tradisyonal nga “tea meeting” ug pag-welcome sa bag-ong presidente.
Sa pag-aginod ni Trump sa US Capitol, tabuon kini sa pagharana sa The University of Nebraska–Lincoln Combined Choirs, dinuyugan sa United States Marine Band. Si Senador Amy Klobuchar ang gitahasan nga mag call-to-order aron masugdan ang seremonya sa pagpanumpa ni Trump. Ang pagpanalangin himoon nila Cardinal Timothy Dolan, Archbishop sa New York, ug Rev. Franklin Graham sa Samaritan’s Purse kuyog ang Billy Graham Evangelistic Association. Kantahon ni opera singer Christopher D. Macchio ang tradisyonal nga pag-awit sa “Oh, America!” ug nasudnong awit sa Amerika, ang “The Star-Spangled Banner.”
Sundan kini sa pagpanumpa sa bise presidente nga si JD Vance, pinaagi ni U.S. Supreme Court Justice Brett Kavanaugh. Human sa pag-inagurar kang Vance, muhalad sa pag-awit si Carrie Underwood, uban ang Armed Forces Chorus ug United States Naval Academy Glee Club, kundiin kantahon nila ang “America the Beautiful.” Human niini, gitakdang manumpa si Trump atubangan ni Supreme Court Chief Justice John Roberts, dinuyugan sa pagpasonata sa “The Battle Hymn of the Republic” gikan sa U.S. Naval Academy Glee Club.
Gibana-bana nga mulungtad sa kapin 30 minutos ang inaugural speech ni Trump nga musentro sa ilang top priority agenda, sama sa immigration law, health care, dugang trabaho, ug pagpalig-on sa international relations. Human sa pagpanumpa, hatagan sa pormal nga pagbiya ang kanhi Presidente nga si Joe Biden, Vice President Kamala Harris, ug ang iyang kabinete. Mu-abante dayon si Trump sa Signing Room alang sa seremonya sa pagpirma isip bag-ong presidente sa ilang nasud. Sunod niini ang pag-aginod ni Trump sa President’s Room pipila ka tikang gikan sa Senate Chamber sa U.S. Capitol aron musaksi ang mga miyembro sa US Congress sa mga bag-ong nominations, memorandums, o executive orders nga iyang permahan.
Una nang gipasabot sa kampo ni Trump nga walay parada nga mahitabo sa Pennsylvania Avenue tungod sa grabeng katugnawon sa temperatura. Kini nga pagpanumpa nagdala ug dako nga paglaom alang sa mga Amerikano nga nagpaabot sa mga kausaban nga iyang gisaad.
