CAGAYAN DE ORO CITY – Nagpabilin pa ang kumpiyansa ug pagsalig ni Police Regional Office 10 regional director Brig Gen Lawrence Coop sa liderato ni Police Col. Reynante Reyes sa Bukidnon PNP.
Kini bisan kon nag-atubang sa seryoso nga pasangil sa kurapsyon ang maong pulis subay sa sulat-reklamo nga nakaabot sa Malakanyang.
Siya miingon nga mausab lamang ang ilang pagtan-aw kang Reyes kon may mga ebedensiya nga mahuptan ang mga imbestigador batok sa maong isyu.
Una usab niini,mismo pa si Reyes ang mipahibalo kang Coop nga nakadawat kini’g sulat nga nag-akusar kaniya nga protector sa illegal numbers game ug utok sa gitawag nga ‘Alive scheme’.
Samtang gihagit ni Reyes ang iyang giingong accusers nga posibleng anaa ra gihapon sa sulod sa PNP nga siya kasuhan aron sila mag-atubang sa korte.
Kini ang dugang reaksyon sa maong koronel nunot sa sulat-reklamo nga nakaabot kang Pres Bongbong Marcos diin nagsaysay sa pasangil nga gipanapian niini ang anaa sa 30 hangtod 40 ka pulis sa balor 15-mil pesos pinaagi sa gitawag nga ‘Alive o Pabuhi’ scheme.
Siya miingon nga may reputasyon usab kini nga giproteksyunan rason nga pangitaan niya’g hustisya ang naguba niini’g dungog nga hinimuan sa gitoohang pipila ka pulis sulod sa Bukidnon PNP.
