CAGAYAN DE ORO CITY – Target ni City Mayor Rolando ‘Klarex’ Uy nga mabuksan na ang city college alang sa mga kabus nga estudyante sa syudad sa Setyembre ning tuiga.
Gibutyag ni Uy nga tukuron ang maong kolehiyo sa 46 ektarya nga yuta nga gidonar sa grupo sa mga lumad diha sa Brgy Dansolihon ning syudad.
Miingon ang mayor nga emosyonal kini sa dihang nasayran nga nag-inisyatiba ang mga lumad aron matuman ang damgo nga city college.
Gilayong miuyon si Uy kay kini mapasayon na sa dakbayan nga dili mogasto sa pagpalit sa mga yuta.
Samtang gi-depensa ni Uy kon nganong sa bukirang bahin tukuron ang labing una nga city college nga alang sa kabus nga mga tinun-an nga gusto makahuman sa ilang gusto nga kurso ning syudad.
Kini human gipahibalo sa mayor nga dunay nakuha nga 10 ektarya nga yuta ang city hall kay midonar ang grupo sa mga lumad aron tukuron ang city college sa Brgy Dansolihon.
Miingon si Uy nga tuyo niini nga dili maapektuhan ang dugay nang state colleges ug universities nga naglihok sa sentro nga bahin sa syudad.
Wala usab balibari ni Uy ang tanyag kay laing tag-duha ka ektarya sa yuta ang gidonar sa 18 ka lumad rason nga may 46 hectares na ang dakbayan nga tukuran sa city college.
Siya miingon nga tipik sa tuyo nganong wala sa sentro ibutang ang tunghaan kay aron mapalambo pa ang sektor sa agrikultura sa bukirang bahin sa syudad.
Gani,sulod sa maong tunghaan tukuron usab ang farm school ug dormitoryo sa mga tinun-an diin target mabuksan sa Setyembre na ning tuiga.
