CAGAYAN DE ORO CITY, Philippines – Kumbinsido si Ukraine’s President Volodymr Zelenskyy nga musaka pa ang ihap sa mga Russian Conscripts nga mutahan sa kamot sa Ukrainian Reconnaissance Group, nga miabante na sa 100 km sulod sa Sudzha, Kursk Region.
Gikompirmar ni President Zelenskyy ang pagbungkad sa Ukraines Airforce sa tulay sa Glushkovsky district, kagahapon.
Gumikan niini, mas mikusog ang paglaum sa Ukraine nga mudaghan pa ang mutahan nga mga sundalo sa Russia samtang nag-aginod sa sentrong bahin sa Russia.
Wala giliomod ni Zelenskyy ang mihungaw nga report nga pulos 18 anyos pa nga mga Rusong Sundalo ang ilang nabihag ug wala kini makig-engkwentro kanila.
Ang Russian Conscripts gilangkoban sa mga lalaking nagpangidad sa 18 anyos nga gimanduan sa balaod sa Moscow nga muhatag sa ilang military service.
Kasagaran kanila, walay military experience ug halos walay military training human gimando ni Russian President Vladimir Putin nga ilabog sila sa mga utlanang bahin sa ilang nasud.
Ang pagsaka sa ihap sa Russian Conscripts nahitabo sa tuig 2022 dihang agresibo pa si Putin nga mangilog sa teritoryo nga iya sa Ukraine.
Dumduman nga sa miaging semana, gipakuratan ni Zelenskyy ang tibook kalibutan dihang nakasulod ang special elite force sa Ukraine sa gikoral nga mga utlanan sa Russia.
