CAGAYAN DE ORO CITY – Patay ang wala pa ilhing tulisan human misukol sa gilusad nga hot pursuit operation sa Valencia City PNP, kagabie.
Gibutyag ni Valencia City Police Director Lt. Col. Surki Sereñas nga duha ka sales lady sa Frontrow Enterprise ang nagpakitabang sa kapulisan human gilimas ang ilang mga wallet, cellphone, mga mahalong items sa ilang tindahan ug cash nga P700 sa ilang kaha.
Paspas nga natumbok sa mga operatiba ang suspek ug nag-ala action star pa kinig pinusilan sa mga pulis.
Namugos si Lt Col Sereñas nga unang namusil ang suspek human makabantay nga dunay mga pulis nga gasunod kaniya.
Miabot sa dul-ag lima ka minutos ang shootout kundiin tolo ka igo pinusilan ang nahiagom sa suspek.
Paspas pa kining gidala sa ospital apan pipila ka minutos ang milabay kini nakabsan.
Sa ulahing pangutana kaniya sa mga kapulisan kung unsa ang iyang ngalan, igo lang kini misulti ug “Angelo”.
Narekober sa suspek ang mga kinawat nga mga butang, 45 kalibre nga armas ug iyang motorsiklo.
