Doble-karambola nga silya-elektrika ang natagamtaman sa tulo ka mga suspek nga nadakpan sa Kapatagan human silang nasakpan nga nagdala og kapin 1.2 million pesos nga balor sa smuggled nga mga sigarilyo tungod lang sa simpleng paglapas sa balaod trapiko sa wala paggamit og seatbelt.
Sumala ni PRO-10 Regional Director Police Brigadier General Christopher Abrahano, nakit-an sa mga awtoridad ang 30 ka master cases sa wala nadeklarang sigarilyo nga gitabonan lang og mga sinina sa likod nga bahin sa duha ka sakyanan nga gikan sa Sultan Naga Dimaporo.
Tungod sa kapakyas sa mga drayber nga silang alyas Aiman, Erwin, ug ang pasahero nga si Assal sa pagpakita og driver’s license ug legal nga papeles sa maong kargamento, gisikop dayon sila sa mga sakop sa 2nd Provincial Mobile Force Company ug uban pang unit sa kapolisan ug militar.
Gipangdala na karon sa Kapatagan Municipal Police Station ang mga nadakpan samtang giandam na sa mga awtoridad ang pormal nga kasong paglapas sa Republic Act 10863 o Customs Modernization and Tariff Act batok kanila.
