CAGAYAN DE ORO CITY – Ipatawag sa gitukod sa konseho nga ‘adhoc committee’ ang pipila ka govt officials nga dunay pagpasagad sa illegal mining operations sa suspected Chinese nationals sa Brgy Tumpagon ning syudad.
Kini human unang gipaabot ni CLENRO manager Engr Armen Cuenca ang impormasyon gikan sa pipila ka residente nga anaa sa usa ka ektarya ang naigo sa illegal mining activities nga wala mabadlong sa brgy officials sa maong lugar.
Namahayag si environment committee chairman Kag. Roger Abaday nga apil ipatawag ang mismong Tumpagon brgy offiicals, kapolisan ug militar nga giingong dunay panag-konsabo sa maong kalihukan.
Samtang gipasalamatan ni Cuenca ang paspas nga aksyon sa konseho kabahin sa illegal mining operations sa pipila ka hinterland brgys sa syudad.
Miingon si Cuenca nga unta masampulan sa silot sa balaod ang mga tawo nga nalambigit sa ilegal mining nga nakuhaan sa mga ebedensiya gikan sa Brgy Tumpagon sa dakbayan.
Siya miingon nga dismayado sila nga mismo ang pipila ka opisyal sa brgy ug mga otoridad ang nagpasagad sa ilang trabaho imbis nga kini ang mohatag sa proteksyon ngadto sa kinaiyahan.
Nasuta nga anaa sa duha ka Chinese nationals ang nag-operate niini inabagan sa mga trabahanteng lokal ug pipila gikan pa sa Davao region.
