CAGAYAN DE ORO CITY-Gikasubo ni Mayor Danilo Lagbas Jr ang sakit nga kamatayon sa 6 anyos nga bata tungod sa pagkasunog sa pinuy-anan niini sa Brgy Buko, Kinoguitan, Misamis Oriental kagabii.
Kini human ‘napa-ig’ ang lawas sa biktima nga si Jeff Myko Salvani kay nalakip pagkasunog sa ilang mugna sa mga kahoy nga pinuy-anan.
Gibutyag ni Lagbas nga himoon usab nila ang ilang makaya aron matabangan sa pagpahimutang ang haya ug lubong sa biktima.
Si Jeff Myko ang bugtong wala makagawas sa tulo ka magsoon dihang miulbo ang sunog tungod sa pagkatumba sa lampara kay nahinanok pag-ayo sa pagkatulog.
Milugwa usab ang report nga nakulatahan ni Jeffrey Salvani ang kamagulangan niyang anak kon nganong wala madala’g apil si Jeff Myko paggawas nila sa balay.
Nasayran nga nanan-aw sa teleserye nga ‘Probinsyano’ ang magpa-pamilya sa ilang silingan apan gipapauli sa magtiayon si Jeff Myko ug Jeff Rolly kay gipaluto sa panihapon kagabii.
