CAGAYAN DE ORO CITY – Gihimakak sa tresurero sa konseho sa Brgy Lapasan nga si Pastor Julieto Manulat Hidalgo nga naka-dispalko kini’g dakong balor sa salapi hinungdang nagtagu-tago sa pila ka adlaw didto sa Agusan del Sur sa Caraga region.
Kini ang pagtin-aw ni Hidalgo sa gipatawag ni Lapasan Punong Brgy Julieto Ogsimer nga pakig-atubang sa media aron e-presentar nga dakong buhi ug himsog ang ilang empleyado nga sekreto mibiyahe sa Agusan Sur aron mangita’g pang-bayad.
Gibutyag ni Hidalgo nga miuli siya’g Caraga kay aron makapamaylo’g 40-mil pesos isip pang-bayad sa gi-kontrata sa brgy nga mga tawo nga miputol sa kahoy’ng balite.
Siya miingon nga nasuko na kaniya ang tawo nga kanunay’ng naningil sa bayad rason nga nangita’g sulbad apan wala mananghid kang Ogsimer.
Dugtong niini,limitado na ang mga tawo nga pasudlon sa buhatan sa tresurero diha sa konseho sa Brgy Lapasan ning syudad.
Kini maoy mando ni Ogsimer resulta sa gisagubang nga suliran sa ilang tresurero nga si Pastor Julieto Hidalgo.
Miingon si Ogsimer nga pabilin ang iyang dakong pagsalig kang Hidalgo apan dili na niini gusto masubli ang hitabo nga naghatag kanila’g grabeng kabalaka.
Pangitaan usab nila’g laing pondo sa brgy ang gipangayo’g bayad sa mga tawo nga gitahasan nila pagputol sa dakong punu-an sa kahoy’ng balite aron masulbad na ang problema.
