CAGAYAN DE ORO CITY-Gitin-aw ni Iligan City Chamber Board of Director Roy Trinidad nga maoy naapektuhan sa kagubot sa Marawi City ang turismo sa ilang lugar.
Si Trinidad miingon nga daghang mga bisita ang nagpa-kanselar sa ilang appointments ug bookings.
Asoy pa niini nga maoy naapektuhan usab ang mga negosyo nga maigo sa gipatuman nga curfew sa maong lugar sama sa mga kalingawan matag gabii ug uban pa.
Samtang gikumpirmar ni Oro Chamber President Robert Pizarro nga daghang mga investor ang nagduha-duha nga mamuhunan sa syudad.
Matud ni Pizzaro nga naka-hold karon ang laraw sa pipila ka mga negosyante nga magtukod sa negosyo.
Apan bisan niini, masaligon si Pizzaro nga ipadayon sa mga negosyante ang ilang laraw nga mamuhunan sa syudad.
Samtang sa laing bahin, nagduso’g resolusyon ang Oro Chamber aron ipaabot ang ilang pagsupak nga sa syudad ibilanggon ug himoon ang pagdungog sa kaso sa mga nadakpang teroristang Maute.
Kini tungod sa kabalaka nga maghatag kini’g hulga sa seguridad sa syudad.
