Nasabtan sa Technical Working Group gikan sa academe ang pagtaas sa kilay ug kahadlok sa pipila ka sektor nga basin ikalugi sa dakbayan ang gihangyo nga 8.5 billion pesos nga loan alang sa bag-ong City Government Complex.
Gipahayag ni Technical Working Group Head Prof. Jestoni Babia nga nagpakita sa gihimong pagtuon nga adunay igong kapasidad ang syudad sa pagbayad tungod kay miabot sa 12 billion pesos ang borrowing capacity sa lokal nga kagamhanan karong tuiga.
Gitin-aw sa opisyal nga gi-minus na sa gihimong pagkwenta ang tanang kasamtangang bayronon ug utang sa dakbayan ayha gihimo ang stress test gamit ang mas taas nga walo ka porsyentong interes.
Dugang pa ni Babia, bisan pa man sa posibleng krisis o kalamidad, nagpakita ang resulta nga musulod gihapon sa gihangyong 8.5 billion pesos ang pinansyal nga katakos sa Cagayan de Oro.
