Giangkon ni Oro Chamber President Engr. Almarico Brito nga adunay pipila ka miyembro sa ilang grupo nga mihangyo nga dili una ipatuman ang ikaduhang tranche sa wage order sa rehiyon nga sugdan karong Mayo 1 tungod sa padayon nga krisis sa lana.
Apan matod niya, bisan adunay mga negosyante nga nagpahayag og kabalaka, dili kini mahimong i‑generalize kay sa kasamtangan, kadaghanan o mayorya sa mga miyembro sa Oro Chamber misugot gihapon sa pagpatuman sa maong pagtaas sa sweldo.
Dugang pa ni Brito, gikinahanglan nga tumanon sa mga negosyante ang ilang gipangsaad sa mga mamumuo tungod kay naglaum na ang mga trabahante nga madawat nila ang maong benepisyo.
Importante matod pa ang pagbalanse tali sa aspeto sa negosyo ug sa kaayohan sa mga empleyado.
Gipasabot usab niya nga nagpadayon ang ilang monitoring aron masuta kung adunay mga establisemento nga naglisod o naghunahuna og pagsira.
Apan sa karon, wala pa sila’y na‑monitor nga seryosong epekto niini.
Kini nagpakita sa resiliency sa mga negosyante nga bisan pa sa kalisod, naningkamot ug nagpadayon gihapon aron matubag ang panginahanglan sa ilang mga trabahante.
