CAGAYAN DE ORO CITY-Nagbahad ang kampo sa United Coconut Planters Bank o UCPB-Velez Branch nga moduso’g kasong robbery batok sa Philippine Coast Guard o PCG-Northern Mindanao.
Kini kon ipadayon sa PCG-10 ang pagmagahi nga dili ibalik ang minilyong salaping cash nga unang nabawi gikan sa mga personahe sa maong bangko sulod sa pantalan sa Brgy Macabalan ning syudad sa miaging semana.
Gibutyag ni UCBP defense counsel Atty Alvin Calingin nga kon gipabuhian sa piskalya ang ilang mga empelyado tungod kay nabasura ang kasong rebellion,walay rason nga dili usab i-uli sa PCG-10 ang P38- milyon pesos ug laing 18-mil dolyares nga gipaubos sa kustodiya.
Samtang itugya’g balik sa PCG-Northern Mindanao ang salapi nga ilang gi-hold gikan sa UCBP-Velez Branch kon may manduan sila sa korte ug ubang ahensiya sa gobierno.
Kini human gipamugos sa PCG-10 nga gihulat nila ang tubag sa ilang komunikasyon nga gipadala sa Bangko Sentral ng Pilipinas o BSP-Manila ug Anti-Money Laundering Council o AMLAC sa legalidad sa pag-release sa maong salapi.
Gibutyag ni PCG District deputy commander Troy Cornellio nga bisan sila ang gusto na nila mabuhian ang kustodiya sa P32-milyon ug laing 18-mil dolyares nga salapi apan naghulat sila sa ensakto nga kamanduan.
Namugos si Cornellio nga giingong gitahasan sila sa piskalya nga dili una buhian ang maong salapi samtang dili masuta ang klaro nga padulngan niini.
