CAGAYAN DE ORO CITY – Bangi tungod sa gugma ang motibo nga gikonsiderar sa kapolisan sa pagpusil-patay sa batan-on diha sa Purok 2, Brgy Basac Lantapan, Bukidnon.
Naila ang namatay nga si Junrey Anghel, residente sa Sitio Mampalanay,Brgy Basac sa maong lungsod.
Miingon si Lantapan Police Station commander Maj Noel Cano nga pauli ang biktima gikan naghatod sa iyang hinigugma dihang gipusil kini sa suspetsado.
Gani, gikompirmar ni Cano nga naila na ang suspek apan nagdumili una kini sa pagbulgar sa pangalan kay nagpadayon pa ang ilang imbestigasyon.
Gitoohan ang may laing uyab sa babaye ang mipusil-patay kang Angel gamit ang .38 kalibre nga armas.
