CAGAYAN DE ORO CITY – Gihataga’g tulo ka adlaw sa Commission on Elections Task Force SAFE si Misamis Oriental Provincial Governor Peter Unabia kabahin sa ‘nursing joke issue ug ang pagsampit sa pipila ka dugu-ong mga hitabo sulod sa Bangsamoro Autonomous Region in Muslim Mindanao (BARMM).
Kini human miani’g init nga reaksyon ang duha ka mga isyu dihang tipik sa sunod sa iyang diskurso sa pagpangampanya kuyog sa ka-linya niini sa lungsod sa Villanueva,Misamis Oriental sa miaging Abril 3 ning tuiga.
Matud ni Task Force SAFE head Director Sonia Bea Wee- Lozada nga gipa-esplikar nila si Unabia kung dili ba kini angay ma-disqualify subay sa unod sa Comelec Resolution 11116 o Anti-Discrimination and Fair Campaigning Guidelines for Purposes of the 12 May National and Local Elections and BARMM Parliamentary Elections.
Siya miingon nga gusto nila makuha ang tubag sa gobernador kon dili ba kini angay ma-disqualify sa pagkadagan o kasuha’g kriminal tungod sa giingong adunay diskriminasyon nga mga komento sa nahisgutang mga pundok.
Sa pagkutlo ning balita, gitun-an pa sa kampo ni Unabia ang mahimong unod sa ilang tubag kabahin sa maong isyu nga nadala sa atensyon sa Comelec-Central Office.
Dumduman nga subli nagpapili si Unabia pagka-gobernador batok sa iyang kanhi gipildi sa 2022 elections nga si former Misamis Oriental 2nd District Congresswoman Juliette Uy.
