CAGAYAN DE ORO CITY – Gihinaut ni kanhi Misamis Oriental Governor Peter ‘Senior Pedro’ Unabia nga unta ipadayon sa bag-ong modumala sa kapitolyo-probinsyal ang maayong mga programa alang sa katawhan sa lalawigan.
Gitumbok ni Unabia ang administrasyon ni Misamis Oriental Governor Juliette Uy nga misugod na pagtrabaho epektibo kaganihang udto.
Miingon si Unabia nga diskresyon sa bag-ong gobernadora ang pagpatuman sa mga programa haom sa administration agenda apan unta masustenir ang mga programa nga dako’g epekto sa kahimtang sa panginabuhian sa katawhan sa lalawigan.
Kini tungod kay sa panahon ni Unabia gihingusgan niini ang pagpaus-os sa ihap sa mga pamilyang gutom ug nagkalisod gikan sa 18 porsiento nahimo nang 15.5% sulod lang sa tulo ka tuig.
Dumduman nga una nang namahayag si Uy sa iyang pagpanumpa atubangan sa katawhan sa lungsod sa Villanueva sa miaging semana nga tipik sa iyang mga programang tutukan ang pagpalig-on sa panginabuhian.
Kini tungod kay magamit niya ang iyang pagsilbing negosyante kung unsaon pagpalig-on ang employment program pinaagi sa pagdani sa mga dagkong mga mamumuhunan nga bugti ang mga trabaho alang sa Misamisnons.
Hisayrang tinguha ni Uy nga mahimong top performing province ang Misamis Oriental sa Northern Mindanao ubos sa pagdumala niini.
