CAGAYAN DE ORO CITY – Gibulgar ni Misamis Oriental Gov. Juliette Uy nga daw nagbaton sa halos 48 milyones pesos nga utang si kanhi Gov. Peter Unabia sa Limketkai Luxe Hotel nga nakabase sa Brgy Lapasan ning syudad.
Kini human nalakbitan sa gobernadora atubangan sa mga benepesaryo sa land title distributions sa Dept of Agrarian Reform 10 sa MSU-Naawan, Misamis Oriental kagahapon sa buntag.
Unod sa mensahe ni Uy nga daw nakurat kini sa nahuptan niya nga impormasyon diin sila giingong gipaninglan sa maong utang.
Taliwala niini,madungog usab sa mensahe sa gobernadora nga maningkamot ang kapitolyo-probinsyal pagpangita sa pondo aron makahatag sa mga proyekto alang sa mga mag-uuma nga nakabase sa lalawigan.
Sa pagkutlo ning balita, gihimakak ni Unabia ang pasangil ni Uy batok kaniya.
Kini tungod kay wala siya sukad nagbaton sa bisan unsa nga obligasyon sa maong patigayon sukwahi sa sulti sa gobernadora.
