CAGAYAN DE ORO CITY – Nakaduso sa ilang kandidatura ang mga kandidato sa Padayon Pilipinas- Lakas CMD-Nationalist Party Coalition nga molansad sa nagkadaiyang katungdanan sa Misamis Oriental sa 2022 elections.
Mismo gipanguluhan ni incumbent Provincial Governor Bambi Emano ang pagduso sa kandidatura diin siya magpapili pagka-kongresista sa segundo distrito sa lalawigan.
Maoy mohulip sa ikabakante niya nga puwesto si Gingoog City Vice Mayor Pedro Unabia samtang pabiling bise-gobernador sa alyansa si incumbent Vice Gov. Jigjag Pelaez.
Magpili’g balik sa unang distrito pagka-kongresista si incumbent Rep. Christian Unabia kinsa anak ni Pedro.
Samtang magpasubli sa ilang katungdanan isip board members sila si Dexter Yasay;Saysay Emano;Boboy Sabal;Eric Khu ug Wayne Militante sa maong bando kontra sa gitakdang political tickets nila ni City Mayor Oscar Moreno ug 2nd District Rep Julliette Uy nga pulos nagtinguha usab pagpapili pagka-gobernador nga wala pa makaduso sa ilang tagsa-tagsa ka kandidatura sa sunod tuig nga eleksyon.
